Kryetari i Partisë Republikane, Fatmir Mediu tha sot në protestën e opozitës se shqiptarët nuk e meritojnë këtë qeveri. Ai i bëri thirrje qytetarëve që të marrin në dorë fatin e tyre, njësoj si vite më parë kur vendi u bë anëtar i NATO-s.
“Sot është dita e njerëzve të lirë, e shqiptarëve pa dallim politik që shpirtin e tyre nuk ia shesin Edi Ramës dhe Rilindjes. Jemi këtu në emër të dashurisë për familjet tona, për vendin tonë. Shqipëria fatkeqësisht sot është vendi më i varfër në Europë. 40% e shqiptarëve sot nuk paguajnë dot energjinë elektrike. A e meritojmë ne varfërinë, pasigurinë dhe korrupsionin? A e meritojmë ne qeverinë e Edi Ramës? Jo dhe vetëm jo. Jemi mbledhur sot këtu edhe për një arsye tjetër, ti bëjmë ballë një rreziku shumë të madh, rrezikut për shkatërrimin e Shqipërisë, shkatërrimin e vlerave morale dhe historisë së këtij vendi”, u shpreh Mediu.
Sipas tij, “Shqipërinë e ka bekuar Zoti, por fatkeqësisht e ka mallkuar kjo qeveri. Le të hapim rrugën e Shqipërisë Europiane. Simboli i rilindjes është varfëria, korrupsioni dhe krimi. Ka vetëm një rrugë për ta luftuar këtë të keqe, është rruga të marrim në dorë fatin tonë. Duhet ti kthejmë përgjigje edhe atyre që na thonë, mos protestoni, se po ndenjëm urtë kështu do na pranojë Europa. Së bashku ne luftuam për vite me radhë, e bëmë Shqipërinë vend anëtar të NATO-s, kurse sot kemi mbyllur çdo rrugë të së ardhmes sonë”.
