Pas deklaratës së ministrit të Shtetit për Diasporën, Pandeli Majko, lidhur me kufijtë Kosovë-Shqipëri, kanë reaguar mediet serbe.
Është gazeta Blic ajo që i ka kushtuar një artikull kësaj çështjeje, teksa citon gazetën Koha Ditore.
Sipas Blicit, Pandeli Majko u bëri thirrje autoriteteve kosovare që ta hapin kufijtë më 1 janar 2018, duke e cilësuar atë si një “veprim evropian”.
“Majko tha se në 1999 kur Shqipëria hapi kufijtë me shqiptarët e Kosovës, askush nuk u kërkoi atyre pasaporta dhe as tani nuk ka nevojë për dokumente”, shkruan Blic.
Më tej, gazeta serbe vijon teksa citon Majkon: “Ne shqiptarët, në anën tjetër po shikojmë mundësinë që të hapim kufijtë deri në janar të 2018-ës. Do e përfundojmë këtë veprim evropian”.
