Liverpool mori një vendim të çuditshëm sa i përket prezencës së Xherdan Shaqirit në Beograd në përballjen me Crvena Zvezdan. Futbollisti me origjinë shqiptare nuk është grumbulluar nga klubi për të shmangur tensionet e mundshme duke ditur që tifozët do ta sulmonin atë. Një vendim aspak i drejtë kur bëhet fjalë për futboll. Ndërsa në komunikatën e trajnerit Klopp ai kërkoi mirëkuptimin e lojtarit, duke lënë të kuptohet që nuk ishte konsultuar me të.
Mediat serbe kanë reaguar pas këtij lajmi dhe kujtojnë festën e Shaqirit me shqiponjë në Kupën e Botës në sfidën ndaj Serbisë dhe për ta ai festim ishte një provokim i hapur ndaj tyre.
“Sportklub.rs”, nuk e fsheh faktin se prezenca e Shaqirit në Beograd mund të shkaktonte tension. Gjithashtu kjo media kujton deklaratat e futbollistit me origjinë shqiptare disa ditë më parë ku shprehej “Nuk kam frikë nga Beogradi, unë do vij për të luajtur futboll”.
Pas vendimit të trajnerit Klopp për të mos e grumbulluar 27-vjeçarin nga Gjilani, nuk kanë munguar as komentet ironike e serbëve. Sipas tyre Shaqiri nuk do të udhëtojë drejt Beogradit për shkak të frikës.
Sipas “Kurir.rs” te Liverpuli e dinë mirë se Shaqiri do të jetë në qendër të sulmeve të tifozëve vendas dhe ai ka menduar që të mos jetë në këtë ndeshje. Gjithsesi, nuk specifikohet në asnjë moment që kjo është një zgjedhje e trajnerit, i cili ka kërkuar në momentin që ka bërë publike listën mirëkuptimin e lojtarit, duke nënkuptuar që dëshira e gjilanasit ka qenë që të mos mungonte në këtë ndeshje. Në mediat serbe thuhet se kjo zgjedhje është bërë për të shmangur problemet.
