Ish-kryeministri i Kosovës Isa Mustafa ka probleme serioze me shëndetin. Madje mediat shkruajnë se ati i rrezikohet jeta për shkak të këtyre problemeve shëndetësore. Në portalin e gazetës Express shkruhet se gjendja shëndetësore e Mustafës është komplikuar seriozisht. Gjithashtu thuhet se Mustafa nuk mundet të lëvizë. Po këto burime shkruan se mjekët dyshojnë se Kryetari i LDK-së është prekur nga sindoroma “Guillain-Barré syndrome”.
Trajtimi i kësaj sëmundjeje për njerëzit që nuk kanë aktivitet të fortë fizik, apo për ata të cilët janë më në moshë, është shumë i vështirë dhe sëmundja mund të lë pasoja.
Ish-kryeministri Isa Mustafa ka një javë që është shtruar në Spitalin Amerikan në Prishtinë për shkak të një gjendje gripale.
“Ai nuk është në gjendje të lëvizë”, kanë thënë burime të afërta me familjen Mustafa, në kushte anonimiteti. Sipas këtyre burimeve, mjekët janë duke kërkuar shkakun e kësaj gjendjeje.
Mustafa do të dërgohet nesër në një spital të Gjermanisë, deri në përmirësimin e gjendjes së tij. Dërgimi i Mustafës jashtë vendit për shërim e ka konfirmuar këshilltari i tij, Besnik Berisha. Ai ka thënë se Mustafa mund të udhëtojë jashtë vendit për disa ekzaminime.
“Dje personalisht e kam vizituar z. Mustafa dhe mund t’ju njoftoj se gjendja shëndetësore e Mustafa tashmë është në përmirësim e sipër dhe se trajtimi i tij është duke shkuar mjaft mirë”, ka thënë Berisha për Klan Kosova.
“Është planifikuar që në ditët në vijim të kryhen dhe disa ekzaminime të cilat ka mundësi që do të bëhen jashtë shtetit dhe z. Mustafa pritet që shpejt t’i kthehet punës dhe aktiviteteve të tij të përditshme politike dhe jo vetëm”, ka treguar më tej ai.
