Mediat franceze i kanë kushtuar disa artikuj fenomenit të çuditshëm të zhdukjes së bletëve në Shqipëri gjatë vitit të kaluar. Në artikujt shkruhet se shkaku kryesor i zhdukjes së mijëra bletëve është pesticidi i fortë i përdorur për kultivimin e kanabisit.
Madje, mediet franceze e quajnë Shqipërinë prodhuesin më të madh të kanabisit në Evropë, ndërsa shtojnë se pesticidet që përdorin fermerët ndikojnë drejtpërdrejt te bletët, duke sjellë vdekjen e tyre.
France Inter shkruan:
“Në një periudhë 1 vjeçare, midis 2015-ës dhe 2016-ës, nga 360 mijë koshere në vend, më shumë se 142 mijë nuk do t’i mbijetonin në dimrin e vitit 2016! Kjo është e padëgjuar më parë dhe është edhe më dramatike, pasi mijëra familje shqiptare jetojnë me tregtimin e mjaltit. Është e vërtetë që dimri ka qenë i vështirë, është gjithashtu e vërtetë që një sëmundje ka sulmuar bletët, veçanërisht pasi bletarët nuk janë në gjendje t’i trajtojnë ato me produkte moderne dhe të shtrenjta. Por, kjo nuk është e gjitha.
Ka një tjetër arsye që qëndron pas këtij numri të lartë të vdekshmërisë së bletëve: kultivimi i kanabisit! Në pak vite, Shqipëria është bërë prodhuesi i parë evropian i kanabisit në terren, duke lënë pas Bullgarinë, Kosovën dhe Serbinë. Ka me qindra hektarë të kultivuar!”
Më tej, kjo gazetë shton se përdorimi i pesticideve ka ndikuar drejtpërdrejt te bletët, të cilat i quan “viktima të shpërthimit të kultivimit të kanabisit.”
“Në vitin 2016, policia shqiptare ka shkatërruar në bashkëpunim me policinë italiane 2 milion e gjysëm rrënjë kanabisi! Gjithsesi, për të prodhuar kaq shumë, shqiptarët përdorin një ton me pesticide, të cilat janë shpesh të ndaluara. Importuesit kryesorë të kanabisit shqiptar, si Italia, Franca dhe Gjermani i kanë lënë rrugë hapur mafias. Kjo edhe për arsye se Shqipëria është mjaft praktike, përdor Adriatikun për të çuar lëndë narkotike në Itali.
Bletët shqiptare dhe bletarët janë viktima të shpërthimit të kultivimit të kanabisit dhe përdorimit masiv të pesticideve, por edhe të mafias lokale dhe hipokrizisë së vendeve të konsumit.”/ TIRANA TODAY
