Nga 1 janari nuk do të shikoni asnjë pikë bastesh në territorin e Shqipërisë. Qeveria vendosi t’u rezervojë basteve sportive një trajtim edhe më të rreptë sesa kazinove.
“Në territorin e Republikës së Shqipërisë, nga 1 janari nuk do të ngrihet më asnjë qepenë për baste dhe, ashtu siç është përcaktuar në ligjin ekzistues, nuk do të ngrihet më asnjë qepen për kazino elektronike në asnjë zonë të banuar”, deklaroi Rama një ditë më parë.
Por një deklaratë e tillë e bërë nga ana e kryeministrit ka bërë jehonë në mediat e huaja.
“Qeveria shqiptare thotë se do të zhvendosë të gjitha kazinotë dhe dyqanet e basteve jashtë zonave të banimit. Kjo do të jetë një masë për të frenuar përhapjen e tyre, veçanërisht në kryeqytetin e Tiranës.
Kryeministri Edi Rama tha të martën se deri më 31 dhjetor të gjitha kazinotë, duke përfshirë dyqanet që merren me baste për sportet dhe garat e kafshëve, do të duhet të mbyllen. Ata do të lëvizin në periferi të qytetit.
Rrugët e qytetit në Shqipëri, një nga vendet më të varfra në Evropë, çuditërisht janë të mbushura me dyqane bastesh sportive.
Kryeministri tha se megjithëse numri i kazinove ka rënë në 20 nga 40 në vitin 2013. Të ardhurat e taksave të fatit të qeverisë janë rritur në 54 milionë dollarë. Ose (47 milionë euro) nga 37 milionë dollarë (32 milionë euro) pesë vjet më parë.
Rama gjithashtu paralajmëroi se mediat që nuk ndalojnë reklamimin ilegal të lojërave të fatit do të “mbyllen me forcë”.
Për pronarët e këtyre bizneseve Rama i kishte një paralajmërim, të cilin e veshi me nuanca politike.
“Për ata që po synojnë ta çajnë rrethimin, për ligjin ekzistues, me metodat që e çanë koalicionin qeverisës kur u shty mbyllja e këtij aktiviteti marrëzie kombëtare, sqaroj edhe një gjë tjetër. Lotaria Kombëtare nuk do të ketë asnjë element të kazinove elektronike, ose siç njihen në gjuhën zyrtare VLT”, theksoi më tej Rama. “Brenda 24 orësh të heqin të gjitha reklamat nga ekranet, nga radiot, nga gazetat apo nga portalet”, u shpreh Rama dje.
Rama i paralajmëron edhe sot
Kryeministri Edi Rama ka paralajmëruar edhe sot për herë të fundit të gjithë portalet që ende reklamojnë biznese bastesh. Ai u kërkon që t’i heqin sa më parë, pasi ndërkohë po punohet për mbylljen e tyre.
“Bastet e kazinotë elektronike do të dalin jashtë ligjit në 31 dhjetor. Ama çdo reklamim i tyre në çdo lloj media, është i jashtëligjshëm”, shkroi Rama në Twitter.
“Portalet që kanë ende reklama të tilla t’i heqin vetë se ndërkohë po punohet për mbylljen e tyre! Mos kemi llafe për lirinë e shtypit pastaj”, tha kreu i qeverisë.
