Britanikja “The Mirror” publikoi dje një artikull mbi mafien shqiptare dhe trafikun e drogës në Britani, lajm ky që sot është pasqyruar edhe nga mediat serbe.
Konkretisht, Kurir ka publikuar artikullin e britanikes, ndërsa shkruan se shqiptarët kanë marrë “frenat” e tregut të drogës në Mbretërinë e Bashkuar.
“Mafia shqiptare mori kontrollin e tregut të kokainës në Britani të Madhe, që llogaritet në pesë miliardë paund. Kjo mafie është rritur ngadalë në tregun e kokainës në Mbretërinë e Bashkuar, pasi një numër i madh i shqiptarëve u zhvendos në Britani, pas rënies së komunizmit në Shqipëri në vitin 1990”, shkruan “Kurir” teksa citon “The Mirror”.
Më tej, media serbe vijon duke shkruar se mafia shqiptare ka futur nën kontroll të plotë tregun e kokainës dhe vlera e përfitimeve arrin në 5 miliardë paund.
“Ajo që ka alarmuar autoritetet angleze lidhet me faktin se çmimi i drogës është ulur dhe kjo rrit shanset për një përdorim edhe më të lartë në shoqëri.
Sipas mediave angleze, mafia shqiptare ka zaptuar tregun e drogës pasi kontaktojnë direkt me kartelet në Amerikën e Jugut duke siguruar “mall” cilësor dhe me çmim të arsyeshëm. Ndërkohë, bazuar tek raportet shëndetësore, mediat angleze kanë theksuar se përdorimi i drogës ka shkaktuar probleme të rëndë sociale dhe sëmundje, kryesisht në sistemin nervor dhe në zemër, shkruan BalkanWeb.
Moshat e reja janë “target grupi” që kanë rënë pre e konsumit të kokainës dhe kjo faktohet nga numri i lartë i vizitave, që kryhen çdo ditë në spitalet e Mbretërisë së Bashkuar.”
