Pas raportimit të ngjarjes një ditë më parë, ku u dhunua një avokat, sot janë zbardhur pamjet filmike. Sikundër duket qartë edhe në pamjet në fjalë, dy persona kanë ushtruar dhunë mbi avokatin Ilia Ilia. Ngjarja ka ndodhur para Prokurorisë së Durrësit.
Ashtu siç deklaroi dje edhe avokati Ilia, fillimisht një prej autorëve, ende të paidentifikuar e ka ndaluar dhe pas një bisede disa sekonda e ka goditur.
Më pas afrohet edhe agresori i dytë.
Ilia Ilia është dhunuar sapo kishte përfunduar një seancë gjyqësore. Ai ka thënë se ishin dy persona që e dhunuan, të cilët sipas tij janë udhëzuar nga prokurori Arjan Ndoj.
“Prokurori Arjan Ndoji ka futur njerëz për të më dhunuar. Njerëzit e prokurorit Arjan Ndoji më sulmuan”, ka thënë Ilia Ilia.
Dyshohet se avokati është dhunuar për shkak të detyrës, ndërsa policia po punon për identifikimin dhe kapjen e autorëve.
Njoftimi i policisë për ngjarjen:
“Më datë 19.07.2018, rreth orës 10:45, në afërsi të Prokurorisë është goditur me sende të forta nga dy persona shtetasi I.I. me profesion avokat, i cili ndodhet në spital, jashtë rrezikut për jetën. Grupi hetimor po punon për identifikimin e autorëve, dhe zbardhjen e plotë të rrethanave të ngjarjes”.
