Policia rrugore mbetet gjithmonë e gatshme dhe në krye të detyrës, për të ndaluar shoferët e dehur apo ata që shkelin rregullat. Siç shihet qartë dhe në pamjet e ofruara nga ana e uniformave blu, drejtuesi i mjetit, një 46-vjeçar me inicialet Xh.D., ka lëvizur me shpejtësi tej normave të lejuara. Jo vetëm kaq, por ai ka qenë nën efektin e alkoolit.
“Gjatë monitorimit të shpejtësisë së mjeteve rrugore në rrugën Interurbane kryesore Tiranë-Durrës dhe anasjelltas, në morinë e shkeljeve mbi kufijtë e lejuar të shpejtësisë, ndodh që të konstatosh shkelje të cilat për shkak të rrezikshmërisë, konsiderohen të rënda, ashtu siç është rasti konkret, i drejtuesit të mjetit Benz B-Clas, 46-vjeçari Xh.D. Kombinim i shpejtësisë mbi normat e lejuara 140 km/h dhe drejtimi i mjetit me këtë shpejtësi nën efektin e alkoolit në masën 0.39 mg/l.
Më shumë se kaq nuk mund të bënte një drejtues mjeti për të rrezikuar seriozisht jetën e tij, të atyre që e shoqërojnë, por edhe përdoruesve të tjerë të rrugës!”, përfundon policia.
