Ish-deputeti i PD-së, Ervin Salianji ka publikuar prova të reja rreth çështjes së “Babales”.
Përmes një deklarate për mediat, Salianji bëri publike të tjera përgjime mes Fredi Alizotit dhe ish-drejtorit të Policisë së Fierit Albert Nushi. Në këtë përgjim zbulohet fakti se këta dy shtetas e kanë paguar Alizotin si dëshmitar.
“Ne sot po ju paraqesim disa prej përgjimeve ku paguhet dëshmitari Alizoti prej drejtorit dhe nëndrejtorit të policisë së Fierit të asaj kohe dhe shumë përgjime të tjera që nuk janë transkriptuar në shkelje të ligjit nga ana e Prokurorisë. Sajimi i dëshmitarit të rremë zbulohet dhe me përgjimet zyrtare të prokurorisë. Fredi Alizoti pranon se po merr para dhe nuk e ka problem të bëjë burg”, tha Salianji.
Ndërkohë Salianji nuk duket ta lërë me kaq pasi ka paralajmëruar publikimin e fakteve të tjera, ditën e nesërme në orën 10.
“Nesër në orën 10 do të kemi fakte dhe prova të reja shkencore të cilat janë në fashikkullin e Prokurorisë dhe janë marrë me vendim gjykate që faktojnë në mënyrë më të plotë dhe ta padiskutueshme të gjithë atë që ne kemi thënë”, tha ai më tej.
