Pjesë të jetës së pabesueshme të Frenk Abanjales u përshkruan në filmin e famshëm të vitit 2002 “Catch Me If You Can” me protagonist aktorin amerikan Leonardo Di Kaprio. Si filmi dhe drama e shfaqur në Broduej në vitin 2011 u bazuan në vetë kujtimet e Abanjales me të njëjtin titull të shkruara në vitin 1980.
I lindur më 27 prill 1948, Frenk Abanjale Xhunior u rrit në Nju Jork. Prindërit e tij u divorcuan herët. Duke jetuar vetëm me babanë e tij, Frenk nisi vjedhjen e dyqaneve që në adoleshencën e tij të hershme. I ati e lejoi atë të përdorte një kartë krediti.
Duke braktisur vjedhjen e dyqaneve, Abanjale vendosi të përfitonte nga karta e babait të tij. Ai blinte gjëra, dhe pastaj i rishiste ato për të fituar para, duke ndarë disa nga fitimet me nëpunësit që kryenin transaksionet.
Mashtrimi funksionoi derisa babait të tij nisën t’i vinin fatura të mëdha. Pasi u zbulua ai u dërgua në një shkollë për “djem të devotshëm. Por Abanjale u arratis në momentin më të parë në moshën 16 vjeç. Me pak para apo arsimim zyrtar, i riu Abanjale duhej të gjente një mënyrë për të mbijetuar.
Një nga veprimet e para ishte manipulimi i patentës së shoferit, për t`a bërë atë të dukej 10 vjet më i madh. Gjithashtu Abanjale shtoi artificialisht arsimimin e tij. Më tej, ai nisi të firmoste çeqe për veten e tij, duke e mbingarkuar me mijëra dollarë borxhe llogarinë e tij të vogël bankare.
Kur kjo skemë u bllokua, Abanjale nisi të hapte llogari të tjera nën identitete të ndryshme të rreme. Ky do të ishte burimi kryesor i të ardhurave të tij në kohën kur ai zhytej në aventura të reja. Një nga ëndrrat e Frenk ishte të bëhej pilot. Kështu ai falsifikoi një kartë identiteti dhe licencë, pastaj telefonoi linjën ajrore Pan Am dhe pretendoi të ishte një punonjës i saj që kishte humbur uniformën e tij në një hotel.
Pan Am i dërgoi menjëherë një uniformë të re. Në atë kohë, linjat ajrore kishin një politikë të tillë, ku pilotët profesionistë mund të udhëtonin falas në çdo linjë. E vetmja kompani që duhej shmangur ishte Pan Am.
Abanjale e shfrytëzoi plotësisht këtë mundësi dhe fluturoi për qindra mijëra km, duke pasur qasje falas në hotele. Edhe pse ishte adoleshent, Abanjale duhet të rrinte me pilotët në kabinën e pilotit dhe të dilte bashkë me stjuardesat.
Madje atij iu kërkua të drejtonte disa avionë, të cilët fatmirësisht i la në opsionin e autopilotit. Pas gjurmimit të disa identiteteve të rreme, policia filloi të hetojë burimin. Abanjale vendosi të largohej nga fluturimi dhe të hynte në botën e jurisprudencës.
Ai u zhvendos në Luiziana ku falsifikoi kopjet e Ligjit të Harvardit, duke arritur të marrë provimin për jurist. Në moshën 19vjeçare, ai figuronte si i punësuar në zyrën e Prokurorit të Përgjithshëm të shtetit të Luizianës. Por shumë shpejt doli që një nga kolegët e Abanjales kishte shkuar vetë në Shkollën e Drejtësisë në Harvard, dhe kishte filluar të bënte kërkime mbi historinë e punonjësit të ri.
Duke parandier telashe, Abanjale iku nga Luiziana dhe shkoi në Xhorxhia. Gjatë aplikimit për një apartament atje, në formularin e aplikimit ku kërkohej profesioni, Abanjale shkroi “doktor”. Shumëshpejt, ai u miqësua me një mjek që rastisi të jetonte në të njëjtën ndërtesë. Mjeku i vërtetë i kërkoi Abanjales të angazhohej si një mjek praktikant në një spital lokal.
Për fat të mirë, ai pozicion nuk kërkonte kryerjen e procedurave mjekësore, por vetëm mbikëqyrje dhe administrim. Sidoqoftë, pati disa urgjenca mjekësore, të cilat mjeku i rremë ia doli disi t`i menaxhonte.
Duke pasur frikë se mos policia dhe FBI po i afroheshin zbulimit të identitetit të tij, Abanjale vendosi të largohej nga Shtetet e Bashkuara, dhe të fillonte një jetë të re në Francë. Por një stjuardesë gjatë udhëtimit për në Francë, e cila ishte gjithashtu një ish e dashura e tij, pa foton e Abanjes në një poster për të shumëkërkuarit dhe telefonoi policinë në vitin 1969.
Mashtruesi u arrestua dhe u burgos për 6 muaj. Pastaj u ekstradua në Suedi ku kaloi në burg edhe 6 muaj tjerë. Më në fund, Abanjale u dërgua sërish në Shtetet e Bashkuara për t’u gjykuar. Por Abanjale nuk u paraqit kurrë në sallën e gjyqit, pasi arriti të arratisej nga burgu. Më pas mori një tren për në Montreal me synimin për të ikur nga Kanadaja për në Brazil.
Por u kap në Montreal dhe u kthye sërish në Amerikë. Abanjale u dënua me 12 vjet burg në Atlanta për falsifikim. Por madje deshi të arratisej sërish nga burgu në vitin 1971. Në përpjekje për të shkuar sërish në Brazil, Abanjale u kap në Nju Jork, dhe u dërgua sërish në burg në Virxhinia.
Në vitin 1974, FBI i ofroi Abanjale një marrëveshje. Në këmbim të lirisë së tij, Abanjale do të duhej t`a përdorte përvojën e tij për t`a ndihmuar FBI-në të zgjidhte krime të tjera të mashtrimit. Ai ra dakord dhe që atëherë ka punuar për dekada me FBI-në. Madje ai ngriti kompaninë e tij e cila i edukonte njerëzit se si të shmangin rënien viktimë e mashtruesve.
Burimi i lajmit: https://www.thevintagenews.com/2019/01/15/catch-me-if-you-can/
Përshtatur nga TIRANA TODAY
