Gjykata e Tiranës caktoi masën e sigurisë “arrest në shtëpi” për mjekun Fitim Marku, i cili u arrestua në ambientet e Spitalit të Traumës pasi kërkoi ryshfet.
Mjeku kishte pësuar ishemi celebrale në paraburgim, dhe ishte dërguar në ambientet e urgjencës. Për shkak të gjendjes së tij shëndetësore, mjeku nuk ka pasur mundësi për të dhënë shpjegime para gjykatës sot, kur ishte caktuar seanca e rivlerësimit të masës së sigurisë.
Mjeku u arrestua pas denoncimeve të qytetarëve për marrje ryshfeti. Ai mori para nga një agjent i infiltruar, ndërkohë që për këtë ngjarje u shoqëruan edhe një infermiere dhe një mjek tjetër. Nga hetimet e kryera deri më tani, rezultonte se këto persona, merrnin shuma të konsiderueshme parash nga pacientë të ndryshëm për kryerjen e skanerave pranë Spitalit të Traumës në Tiranë.
Në bisedën e përgjuar më 23 shtator, në orën 14:20, rezulton se Marku i kërkon 10 mijë lekë një pacienti.
Në bisedën e tij me agjentin e infiltruar si pacient i thotë: “Kur të mbarosh skanerin, më merr në telefon, më prit aty.” Gjithashtu zbulon se në skemën e korrupsionit janë edhe të tjerë, pasi tregon që paratë i ndan me kolegët. Pasi i jep paratë, mjeku e udhëzon që të presë jashtë, sepse do bëjë gati diskun me rezultatet e skanerit.
