Nderohet me çmimin e karrierës në Shkodër, ish-kryetarja e Kuvendit, Jozefina Topalli.
Gjatë fjalimit të mbajtur në Universitetin e Shkodrës, Topalli u shfaq e surprizuar nga marrja e këtij çmimi, teksa u shpreh se ‘kur bie nga pushteti zakonisht humbet edhe shansin për tu vlerësuar dhe për tu nderuar’.
Duke komentuar eksperiencën e saj politike, Topalli u shpreh se 4 persona po mbajnë peng vendin, teksa shtoi se as në ëndërr nuk e kishte menduar djegien e mandateve nga PD.
“Isha me djalin e porsalindur të vajzës në krah kur mora mesazhin nga një pedagoge e universitetit dhe më tha se do nderohesha me një çmim. U habita se kur bie nga pushteti nuk të japin çmime.
Unë isha mësuar që sistemi edhe pse isha e para hiqnin foton time nga tabela e nderit, as sot nuk ka ndërruar sistemi. Nëse kritikon shefin shpallesh armike.
Kurrë nuk e kam imagjinuar se do isha kryeparlamentare, por as në ëndërr se kam imagjinuar se në liri do kishte mungese përfaqësimi dhe djegie mandatesh.
Më kanë hequr nga politika kur kisha për të dhënë më shumë. 4 persona mbajnë sot peng vendin, vetëm fëmijët tanë mund të sjellin ndryshimin. Do të ishte më mirë të iknin katër shahista, sesa të largohen shqiptarët nga vendi i tyre”, tha Topalli.
