Ambasadori amerikan Donald Lu ka takuar kreun e Partisë Demokratike, Lulzim Basha në ambientet e selisë blu.
Edhe pse për PD-në nuk ka më mundësi që të hyjë në zgjedhje duket se SHBA-të po i japin edhe një shans Bashës të bëhet pjesë e procesit zgjedhor.
Takimi i ambasadorit Lu dhe Bashës vjen pak orë pas thirrjeve senatorit amerikan John McCain se Partia Demokratike duhet që të marrë pjesë në zgjedhje. Ambasadori Lu përcjell qëndrimet e qeverisë amerikanë për situatën politike në Shqipëri dhe për zgjidhjen e ngërçit politik.
Për Amerikën është e papranueshme mospjesëmarrja e opozitës në zgjedhje, për këtë arsye ajo po lëviz të gjithë strukturat e saja për politikën e jashtme.
Përveç takimeve të njëpasnjëshme të ambasadorit Lu, të hënën, më 15 maj, SHBA-të do sjellin në Tiranë zv/ndihmës sekretarin amerikan të Shtetit, Hoyt Brian Yee, që të negociojë me politikanët shqiptarë.
Por McCain nuk ka qenë i vetmi sot që ka bërë thirrje ndaj PD-së. Gjithashtu, eurodeputeti Knut Fleckenstein ka bërë thirrje që Partia Demokratike të marrë pjesë në zgjedhje.
