Mbytjet në bregdetin shqiptar e kanë kthyer vëmendjen te shkaqet e këtyre tragjedive.
Zhytësi Ismajl Kasumi nga Kosova, me një eksperiencë 50-vjeçare në realizimin e aksioneve të kërkim-shpëtimit, ka dhënë arsyetimin e tij lidhur me këtë çështje, si dhe disa këshilla se si duhet vepruar në raste rreziku.
Në një intervistë për Klan Kosova, Kasumi u shpreh se rastet e mbytjeve vijnë si pasojë e mungesës së rojeve bregdetare në bregdetin shqiptar si dhe mungesës së zonave të precizuara se deri ku qytetarët mund të notojnë.
“Gjithë këto raste të mbytjeve janë një tragjedi, mirëpo në bregdetin shqiptar nuk janë të precizuara vendet deri ku mund të notojnë qytetarët, mungojnë shpëtimtarët dhe nuk ka vrojtore. Do të apeloja tek të gjithë pronarët e plazheve që të precizojnë këto zona sa më shpejt, ndryshe apeloj tek qytetarët mos t’i bëjnë pushimet në bregdetin shqiptar”, ka thënë Kasumi.
Më pas, Kasumi bëri një krahasim me bregdetin e Malit të Zi dhe atë të Kroacisë, teksa tha se në dallim nga Shqipëria, këto dy vende kanë të saktësuar zonat për not si dhe kanë roje bregdetare nëpër plazhe.
Ndërsa disa nga këshillat e Ismajl Kasumit, në lidhje me notin dhe rrymat detare janë si më poshtë:
“Nuk duhet të futeni në ujë me trupin e nxehtë e të djersitur. Trupi duhet ngadalë t’i përshtatet temperaturës së ujit.
Vala kur vjen ngritet dhe bie, kështu duke formuar një kanal, një rrymim të ujit, që të tërheq dhe mund të jetë fatale për jetën e njeriut.
Në qoftë se ndodh që ndonjë person është duke u mbytur në ujë, nuk duhet t’i afrohemi përpara. Duhet të jemi të kujdesshëm të largohemi nga personi, si ta kapim dhe si ta nxjerrim nga uji”.
