Piloti 32-vjeçar Charalambos (Babis) Anagnostopoulos, i cili vrau gruan e tij Carloine, kaloi natën e tij të parë në burgun e Koridhalosit. Portali grek Newsbomb.gr, bën me dije se Babis nuk u dërgua në karantinë, për shkak se kishte kryer testin e Covid-19, ku kishte rezultuar negativ.
Ashtu si gjatë arrestimit të tij nga autoritetet policore, mbrëmjen e djeshme, Babis Anagnostopulos ishte i ftohtë dhe u dërgua në qelinë e tij pa folur asnjë fjalë.
Mëngjesin e sotëm, ai u takua me drejtoreshën e burgut Mary Stefi, procedurë standarde kjo për të gjithë të paraburgosurit.
Mësohet se ai kërkoi një punë sepse dëshiron ta kalojë kohën e tij. Po ashtu, ai ka kërkuar që të përdorë telefonin e burgut, por ende se ka shfrytëzuar të drejtën e një telefonate.
Babis nuk është vetëm në qeli, por me tre persona të tjerë. Njëri është një oficer burgu që vuan një dënim për drogë, i dyti për kontrabandë dhe i treti gjithashtu për drogë.
Babis Anagnostopulos u arrestua disa ditë më parë, më shumë se një muaj pasi mbyti të shoqen dhe u mundua ta fshihte krimin, duke sajuar një grabitje.
