Përfaqësuesi i PS-së në tryezën e Reformës Zgjedhore, Damian Gjiknuri deklaroi se është arritur dakordësia mes palëve politike për disa çështje të rëndësishme.
Palët kanë gjetur marrëveshje për 3 nga pikat e diskutuara në mbledhjen e gjatë të Këshillit Politik. Në një prononcim për mediat pas mbledhjes, Gjiknuri tregoi se është rëndë dakord për të zvogëluar periudhën zgjedhore, si dhe është pranuar financimi miks.
Sipas Gjiknurit u pranua të shkurtohet periudha zgjedhore në afatet 15 Prill- 15 Maj ose 15 Tetor- 15 Nëntor.
Ai tha se është rënë dakord edhe për parimin e kuotës gjinore që një në tre emra të jetë nga gjinia femërore. Ndërkohë, mbledhja e ardhshme do të mbahet ditën e enjte.
“Është një periudhë shumë e mirë për të bërë zgjedhje në Shqipëri, pasi edhe klima është më e mirë. Pjesëmarrja sa më e lartë në zgjedhje do të jetë një gjë shumë e mirë.
Ramë dakord edhe për parimin e kuotës gjinore, që një në tre emra të jetë nga gjinia femërore, të shoqëruar dhe me sanksionet përkatëse. Nisur nga ky parim duhet të shihet si të eliminohen disa shqetësime.
Ramë dakord që të kemi dhe financimin miks, pra financim nga qeveria, dhe pjesa tjetër nga donacionet, por duke e ulur në një raport më të pranueshëm. Qeveria ka marrë përsipër të shtojë vlerën totale që do të jepet për fushatën e ardhshme zgjedhore. Kapitulli i financimit të fushatës ka marrë dakordësim.
Vendosëm që mbledhjen e ardhshme ta kemi ditën e enjte, ku do të trajtojmë disa çështje të tjera. Këto ishin rezultatet e kësaj mbledhjeje dhe jam i kënaqur se kemi bërë disa hapa”, tha ai.
