Kroacia zhvilloi një Botërorë mjaft të mirë duke shkuar deri në finalen e eventit më të madh të futbollit, por në fazën finale u dorëzua përballë Francës. Mbrojtësi kroat, Dejan Lovren është shprehur shumë i zhgënjyer që nuk e fituan ata trofeun, pasi sipas tij Franca nuk luajti futboll. Një pjesë të fajit ai ia faturoi edhe VAR-it, për atë penallti që është kontestuar shumë edhe nga ekspertë të futbollit, por që arbitri argjentinas e akordoi.
“Isha i sigurt se arbitri nuk do ta jepte penalltinë. Perisiç ishte shumë pranë topit dhe nuk mund të reagonte dot. Ishte një moment kritik, pasi ne sapo kishim barazuar ndeshjen në 1-1. Disa thonë se ishte penallti, disa thonë jo. Por, çfarë mund të bëjmë ne tani? VAR-i bën punë, por sigurisht që ka edhe ai nevojë për përmirësime.
Franca nuk luajti futboll. Ata pritën rastin e tyre dhe shënuan. Patën taktikën e tyre, dhe duhet ta respektojmë. Por, e vërteta është se çdo ndeshje të turneut e kanë luajtur kështu. Jam i zhgënjyer pasi humbëm ndeshjen duke luajtur shumë më mirë se ta. Gjithsesi, jam krenar për atë që ka bërë vendi im”–deklaroi Lovren.
