Paraditen e sotme, është mbledhur Komisioni Hetimor për shkarkimin e Presidentit të Republikës, Ilir Meta.
Kryetari i Posaçëm i këtij Komisioni, Alket Hyseni gjatë fjalës së tij u shpreh se të gjithë anëtarë do të bazohen vetëm mbi Kushtetutën dhe rregulloren e Kuvendit, përtej politikës.
Hyseni ka bërë me dije se Meta është njoftuar sipas procedurës, por nuk ka pranuar të paraqitet. Sipas Hysenit, Meta ka dëmtuar edhe reputecionin e Shqipërisë.
Alket Hyseni: ”Do të bazohemi vetëm mbi detyrimin tonë Kushtetues, rregulloren e Kuvendit dhe ligjet e Komisionit të Ligjeve. Objektivi përcaktohet nga vendimi i parlamentit për ngritjen e këtij Komisioni mbi kërkesën e deputetëve. Meta nuk u paraqit në Komisionin e Ligjeve, më tej Komisioni paraqiti raportin Kuvendit për hetimin nëse aktet dhe deklarata e Metës para, gjatë dhe në heshtjen zgjedhore janë në shkelje të Kushtetues, nëse ka nxitur urrejtje dhe dhune. Do i qëndrojmë strikt objektit të punës”.
Një ditë më parë, Ngritja e komisionit hetimor u votua me 97 vota pro dhe 6 kundër në Kuvendin e Shqipërisë. 49 deputetë të mazhorancës iu drejtuan më herët Kuvendit me kërkesën për shkarkimin e Kreut të Shtetit.
Prej javësh, Presidenti i Republikës, Ilir Meta u përfshi në një sërë replikash të ashpra dhe përplasje me Partinë Socialiste ku në fokus ishin zgjedhjet e 25 prillit. Presidenti u zotua se do të mundësonte votën e lirë të shqiptarëve që sipas tij do ti bashkoheshin në një referundum popullor.
Deklaratat e tij gjatë fushatës arritën majën e tensionit kur kreu i shtetit deklaroi se “do t’ju presim dorën atij që prek votën”, apo “bëni gati sfurqet dhe kosat”.
