Qeveria e Maqedonisë dhe e Shqipërisë do të takohen në një mbledhje të përbashkët që do të mbahet në Pogradec. Mbledhja do të mbahet pas dy ditëve më 15 dhjetor. Qeveria maqedonase po kërkon të faktorizohet në rajon dhe te tërheq sa më shumë investime në vendin e saj sepse më 23 nëntor ajo zhvilloi një mbledhje të përbashkët me qeverinë e Bullgarisë. Ndërkohë, kryeministri i Maqedonisë, Zaev zhvilloi dje një takim zyrtar në Kosovë. Kjo është vizita e parë zyrtare e një kryeministri të Maqedonisë në Kosovë.
Pas katër mbledhjeve të përbashkëta që qeveria “Rama” ka mbajtur me qeverinë e Kosovës, në fundjavë do të ulet në tryezë me kabinetin e Zoran Zaevit.
Deri tani akoma nuk është publikuar agjenda e mbledhjes së përbashkët mes dy qeverive, por njësoj si në rastin e takimit Shqipëri-Kosovë, ai pritet të jetë më shumë një gjest simbolik bashkëpunimi, se sa për projekte dypalëshe.
Pak javë më parë, gjatë takimit të përbashkët mes ministrit të jashtëm Ditmir Bushati me homologun maqedonas Nikola Dimitrov, u njoftua se do të kishte një mbledhje të përbashkët të dy qeverive, por data nuk ishte përcaktuar.
