U zhvillua java e parafundit e kategorisë Superiore e cila është shoqëruar me shumë surpriza. Vllaznia është ekipi që përfitoi nga kjo javë pasi mposhti Kukësin dhe Kamza u mposht në shtëpi nga Laçi, duke mbajtur të gjallë shpresën deri në javën e fundit për mbijetesë. Shkodranët do të përballen me Skënderbeun pa pretendime në javën e fundit, ndërsa Kamza do të përplasë brinjët me Partizanin ku të dy ekipet kanë pretendime për të mbyllur sezonin me fitore, njëra për të shpëtuar e yjetra Europën.
Shkodranët luanin sot shansin e fundit për të qëndruar në Kategorinë Superiore, dhe me këtë fitore si dhe falë humbjes së Kamzës 1-2 ndaj Laçit, tani ka shanse reale nëse fiton ndeshjen e fundit ndaj një tjetër skuadre të pamotivuar siç është Skënderbeu kampion. Ndërkohë Teuta ka shpërthyer në gola për ndeshjen e fundit brenda fushe duke shpartalluar Lushnjën me rezultatin 6-2 në Niko Dovana.
Tre ekipet që luftojnë për një vend në Europë kanë marrë fitore edhe në javën e parafundit. Luftëtari ka fituar 2-1 ndaj Skënderbeut, ndërsa Laçi triumfon ndaj Kamzës. Edhe Partizani ka fituar ndeshjen ndaj Flamurtarit me rezultatin 2-1. Gjithçka mbetet për t’u vendosur në javën e fundit të sezonit. Si për skuadrën e dytë që do të bjerë nga kategoria, ashtu edhe për skuadrën e fundit që do të kualifikohet për në Europë.
