Është momenti i Sergio Ramos, por këtë herë jo në fushën blertë. kapiteni i Real Madrid këtë fundjavë do të kurorëzojë me martesë lidhjen e dashurisë me partnere e tij, prezantuesen televizive Pilar Rubio. Çifti është në një lidhje që nga viti 2012 dhe kanë 3 djem, ndërsa tani kanë vendosur të organizojnë edhe dasmën në katedralen më të famshme të Sevillas.
Por më shumë sesa ceremonia martesore e çiftit Ramos-Rubio e cila ishte vendosur prej kohësh, lajmi i bujshëm ka të bëjë me faktin se mbrojtësi i Los Blancos nuk ka ftuar në dasmën e tij, ish-shokun e skuadrës Cristiano Ronaldon me të cilin luajtën për 9 vite sëbashku te Reali i Madridit.
Një lajm bombastik ky i zbuluar nga gazeta madrilene “Marca” që nënkupton se marrëdhëniet shoqërore mes kapitenit të Realit të Madridit dhe 5-herë fituesit të Topit të Artë nuk kanë qenë aspak të mira. Dyshohet se gjithçka është thyer pasi Ronaldo u largua nga Madrid.
Në dasmën çiftit Ramos-Rubio do të jenë plot 500 të ftuar mes tyre edhe dyshja e famshme David Bechkam-Victoria Beckham me anglezin që ka luajtur bashkë me Ramosin te Reali për 2 vite, ndërkohë që Sergio ka ftuar në dasmë edhe shokun e tij të repartit në kombëtaren spanjolle Gerard Pique i cili do të shoqërohet nga partnerja e tij, këngëtarja Shakira.
Dy emra këta që shtojnë thashethemet mbi vendimin e Ramos për të mos ftuar Ronaldon. Në festën që do të zhvillohet pas ceremonisë në kishë, do të performojë grupi i njohur muzikor i rock-ut AC/DC, prania e të cilëve në dasmë do t’i kushtojë xhepave të çiftit Ramos-Rubio plot 900 mijë paund.
Të pranishëm në atë që konsiderohet si dasma e vitit do të jenë edhe presidenti i Realit Perez dhe trajneri Zidane ndërsa i ftuar është edhe portieri legjendar i Los Blancos Iker Casillas, prania e të cilit është ende në dyshim për shkak të atakut në zemër që pësoi disa javë më parë.
