Të paktën 248 persona kanë mbetur të vdekur, ndër të cilët 21 fëmijë si pasojë e tërmetit me magnitudë 7.1 që goditi dje Meksikën. Epiqendra e tërmetit ishte pranë qytetit Puebla të Rabosos, rreth 122 kilometra në juglindje të kryeqytetit të Meksikës, me një thellësi prej 51 kilometrash.
Autoriteti i Mbrojtjes Civile deklaroi se tërmeti i fuqishëm shkaktoi shpërthime të gazit duke përmbysur disa ndërtesa dhe duke detyruar mijëra njerëz të evakuohen.
Kryebashkiaku Miguel Angel Mancera tha se ndërtesat ranë në 44 vende në Mexico City, ku më shumë se 50 vetë vdiqën dhe zjarre shpërthyen në disa prej tyre.
Sekretari i Brendshëm Miguel Angel Osorio Chong tha se ekipet e shpëtimit po punonin me kujdes dhe po kërkojnë me ndihmën e lopatave për të nxjerrë njerëzit që janë bllokuar.
“Ne kemi disa ndërtesa ku kemi të dhëna që mund të ketë njerëz brenda. Ata po e bëjnë këtë me shumë kujdes,” tha sekretari i brendshëm, duke shtuar se do të nevojitej më shumë personel shpëtimi për nxjerrjen sa më parë të të bllokuarve.
Në një tjetër vend, gazetarët panë qytetarë teksa gëzoheshin kur një grua u nxor nga rrënojat. Ekipet e shpëtimit menjëherë kërkuan heshtje që të mund të dëgjonin personat e tjerë që mund të ishin të bllokuar.
Në kryeqytetin e Meksikës, ka pasur kaos për shkak të trafikut të rënduar, ndërsa nga ana tjetër ambulancat nxitonin të shpëtonin të lënduarit.
Qindra civilë nxituan të ndihmonin në kërkimin e njerëzve që mund të ishin bllokuar. Jorge Lopez, një spanjoll 49 vjeçar që jeton në qytetin e Meksikës, tha se kur ra tërmeti, ai shkoi menjëherë në shkollë, ku kishte fëmijët e tij të moshës gjashtë dhe tre vjeçare. Ai e gjeti shkollën të shembur.
“Arritëm në shkollë dhe të gjithë po qanin, të gjithë ishin të tmerruar, ndërsa dhe fëmijët po mbaheshin në një litar. Është e pakontrollueshme, nuk mund të bësh asgjë kundër natyrës”, tha Lopez.
Lazaro Frutis, një 45 vjeçar u arratis nga zyra përpara se gjithçka të shembej në tokë. Ai tha për mediet: “Ne ia mbathëm jashtë duke menduar se gjithçka përreth nesh do të rrëzohej. Gjëja më e keqe është, ne nuk dimë për familjet tona apo ndonjë gjë tjetër”.
Tërmeti i fuqishëm vjen pak ditë pas një tjetër tërmeti me magnitudë 8.1, i cili shkaktoi të paktën 98 viktima. Pamjet e mëposhtme dëshmojnë tmerrin e përjetuar nga banorët, ndërsa po vazhdohet kërkimi i njerëzve që mund të kenë mbetur nën rrënoja.
Fatkeqësisht, pritet që bilanci tragjik të rritet ende, pasi shumë njerëz rezultojnë të humbur, të cilët dyshohet se kanë mbetur nën gërmadhat e dhjetëra banesave të shkatërruara./ Tirana Today
[ngg_images source=”galleries” container_ids=”454″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
