Kaos total dhe pandemi që nuk ka “frena” e megjithatë sezoni i ri i futbollit sapo ka nisur!
Ndodh në Brazil, në ligën e parë të futbollit, atje ku pavarësisht shifrave shqetësuese të infektimit me Covid-19, kampionati zhvilloi javën e parë fundjavën që lamë pas.
Në epiqendrën më të madhe të koronavirusit, pas Shteteve të Bashkuara, situata kritike me pandeminë është reflektuar edhe në futboll atje vetëm në muajin e fundit janë riregjistruar mbi 150 raste pozitive futbollistësh me koronavirus.
Numrat flasin për një situatë jashtë kontrolli duke qenë se shifra e të prekurve kalon 350 persona nëse përfshihen edhe anëtarët e stafeve, shkruan “A2”.
Megjithëse kampionati ka nisur disa takime u shtynë, të tilla si ajo mes Goias dhe Sao Paulos pasi ekipi vendas kishte 10 raste pozitive në skuadër dhe nuk kishte mjaftueshëm futbollistë për të zbritur në fushë.
Situata më e rëndë është tek klubi i Corinthias, me plot 23 futbollistë të infektuar. Goias dhe Botafogo me 22 dhe 18 persona të prekur respektivisht.
Vazhdimësia e kampionatit në këto kushte duket e pamundur. Federata Braziliane e futbollit nuk ka ndërmend të mbyllë sezonin e sapo nisur por ka njoftuar ndryshime në protokollin sanitar dhe shtim të numrit të testimeve.
