Pas deklaratave të forta të kryeministrit Rama sot gjatë ditës së marrëveshjes së përbashkët mes qeverisë së Kosovës dhe Shqipërisë, vjen reagimi i ministrit të Jashtëm serb.
Ivica Daçiç, tha se me mbështetjen që Rama i bëri taksimit 100% të produkteve serbe, Rama po shkel marrëveshjen rajonale për bashkëpunim.
“Rama ka shkelur marrëveshjen rajonale të bashkëpunimit, hapësirën e bashkëpunimit ekonomik, të gjitha ato për çfarë kemi biseduar. Është e pakuptimtë që të mbajmë takime të tilla për bashkëpunim rajonal, pas asaj që ka thënë sot Rama së bashku me Haradinajn”, deklaroi Daçiç për mediat serbe.
Gjatë fjalës së tij, kryeministri Rama tha se Shqipëria mbështet plotësisht taksimin e produkteve serbe, masë që është një vendim politik dhe jo ekonomik, ndërsa kritikoi edhe BE-në për të cilën tha se po përkëdhel Serbinë.
