Arba Kokalari është zgjedhur eurodeputetja e parë shqiptare në Parlamentin Europian.
32-vjeçarja shqiptare, e cila jeton preh vitesh në Suedi, mori mbështetjen e suedezëve në zgjedhjet për PE që u zhvilluan ditën e djeshme, teksa arriti që të fitonte me partinë e Moderatëve suedezë, pjesë e Partisë Popullore.
Pas daljes së rezultateve, Kokalari shkruan në “Facebook”: “Unë kam hyrë në parlamentin evropian! Faleminderit për të gjithë ata që kanë luftuar për mua!”
Ndërkohë, kreu i PD-së, Lulzim Basha e ka cilësuar këtë një moment historik, ndërsa bën me dije se e ka uruar në telefon eurodeputeten e parë shqiptare.
Arba Kokalari, e cila filloi të merrej për herë të parë me politikë që në moshën 16-vjeçare, është mbesa e Musine Kokalarit, kjo e fundit diplomuar në “La Sapienza” të Romës në vitin 1941, por që u dënua dhe internua më vonë nga regjimi komunist i Enver Hoxhës në Shqipëri dhe vdiq në 1983.
Vitet e fundit, eurodeputetja shqiptare udhëhoqi rininë dhe departamentin e Kulturës në qytetin e Stokholmit, po ashtu ishte zëvendëse e kryetarit të shoqatës së EPP-së YEPP në maj 2015.
Postimi i plotë i Bashës:
Të dashur miq, sapo urova në telefon Eurodeputeten e parë shqiptare, shqiptaro-suedezen Arba Kokalari që u konfirmua pak çaste më parë si fituesja e mandatit të eurodeputetes për partinë e Moderatëve suedezë, simotrës tonë në Partinë Popullore Europiane!
Natë e paharrueshme për Arbën dhe familjen e saj, natë fitore për Moderatët që konfirmuan 4 eurodeputetë dhe natë historike për të gjithë ne shqiptarët që inagurojmë me Arba Kokalarin praninë shqiptare në ulëset e Parlamentit Europian!
Krenar dhe i lumtur me fitoren e Arbës, ju shpreh mirënjohjen time të gjithë bashkatdhetarëve tanë në Suedi që me votën e tyre e mundësuan këtë moment historik!
Dua po kështu t’ju falenderoj me mirënjohje në emrin tim dhe të Partisë Demokratike, të gjithë ju bashkatdhetarë të nderuar në vendet e BE që me votën tuaj për partitë simotra të PD, rikonfirmuat Partinë Popullore Europiane si forcën e parë politike në Parlamentin e ardhshëm Europian!????✌️ #ShqipëriaSiEuropa
