Pas finalizimit të operacionit antidrogë të koduar “Mesnata”, janë sekuestruar 725 kg e 200 gr lëndë narkotike Cannabis Sativa si dhe dy automjete.
Operacioni u zhvillua në lagjen “24 Maji” në Vlorë, nga ana e Seksionit për Hetimin e Narkotikëve në DVP Vlorë, në bashkëpunim me repartin “Delta Forcë”.
Sasia e lëndës narkotike u gjet në një banesë 4-katëshe, në pronësi të shtetasit Artan Kalemi, ku në katin e dytë dhe të katërt të banesës është konstatuar dhe sekuestruar nga policia një sasi lënde narkotike Cannabis Sativa me peshë totale prej 725 kg e 200 gr.
Gjithashtu, u arrestuan në flagrancë dy persona, konkretisht shtetasit Artan Kalemi, 34 vjeç, banues në Vlorë dhe Xhemil Kalemi, 41 vjeç, banues në Vlorë, që në përfundim të hetimeve rezultoi i përfshirë në këtë vepër penale.
Policia ka sekuestruar edhe dy automjete, ndërsa vijojnë procedurat për verifikimin dhe sekuestrimin e një vile banimi dhe një ambienti biznesi në pronësi të shtetasit, të cilit iu gjet lënda narkotike.
