Mërgim Mavraj nuk ka fshehur asgjë kur është pyetur për situatën që është duke kaluar Shqipëria. Dy ndeshjet e fundit ishin një pasqyrë e shëmtuar për kuqezinjtë të cilët kishin shkëlqyer nën drejtimin e De Biasit. Mavraj u shpreh se kishte një mungesë dëshire në grup dhe nuk po jepnin atë që duhet, ndërsa foli edhe për sistemin e lojës dhe incidentit të Panuccit me tifozët në fund të takimit me Ukrainën. Në fund disa fjalë edhe për problemet në prapavijë.
SITUATA – “Është shumë vështirë të gjesh, janë shumë gjëra që nuk funksionojnë. Me thënë të drejtën, asgjë nuk funksionoi. Nuk ecën as sistemi, as mënyra e lojës, as lojtarët si paraqiten, as vullneti as pasioni siç kemi qenë gjithmonë. Me pasion i kemi mbuluar disa gjëra, por të gjitha këto mungojnë. Kur mungojnë të gjitha e sheh rezultatin e tij. Çdo ekip e përjeton një situatë të tillë. Edhe sistemi ka ndryshuar. Duke bërë presion shumë, nuk e di nëse është i duhuri. Duhet kohë. Me Kosovën dhe Ukrainën nuk ka funksionuar. Ne nuk dorëzohemi. E kemi për detyrë t’i përgjigjemi kësaj situate. Besoj se ia dalim të gjithë së bashku”.
KONTESTIMET E TIFOZËVE – “Është e vështirë ta komentosh, nuk e kam përjetuar. Edhe tifozët duhet t;i respektojnë gjërat, edhe kur kemi situata të tillë. Humbim dhe fitojmë së bashku. Nuk është gjë e mirë, duhen respektuar gjërat edhe kur nuk kemi sukses. Edhe nga ana e trajnerit nuk ka qenë e lehtë, pasi është mërzitur shumë pas këtyre dy ndeshjeve”.
PROBLEMET NË MBROJTJE – “Nuk është vetëm mbrojtja që ka gabuar ndaj Ukrainës, kur e shoh që Mesfusha e kundërshtarit ka pasur kohë dhe e ka bërë lojën si ka dashur dhe ka ardhur me shpejtësi te ne. Janë shumë gjëra, nuk është vetëm një argument që kemi pësuar shtatë gola”.
