Napoli ka arritur të fitojë me shumë vështirësi në transfertën delikate me Udinesen, me rezultatin e ngushtë 1-0. Maurizio Sarri, trajneri i Napoli-t është shprehur mjaft i kënaqur me tre pikëte fituara dhe me ngjitjen sërish në vendin e parë, por nuk i ka kursyer kritikat për këtë ndeshje. Ai është i shqetësuar për terrenin ku u zhvillua kjo sfidë, pasi fusha ku luajti ekipi i tij sot ishte një turp dhe nuk të lejonte të bëje dy-tre pasime njëra pas tjetrës. Sa i përket Napolit si një ndër pretendentët kryesorë të këtij edicioni të Serie a, Sarri është i qartë që nuk janë vetëm ata pasi janë disa ekipe që nuk po gabojnë dhe po rrinë në majë të tabelës pas tyre duke pritur që të gabojnë.
“Vitet e kaluara, në ndeshje të pista si kjo kemi patur më shumë vështirësi, por sot nuk ka qenë kështu. Por të luash në një fushë të tillë është një turp, nuk mund të bëheshin tre pasime radhazi. Kjo është fotografia e futbollit italian. Ndeshja me Juventus do të jetë prestigjioze, e rëndësishme, por nuk do të jetë vendimtare. Mungojnë edhe shtatë muaj nga fundi i kampionatit. Ne, ekipi për t’u mundur? Renditja thotë të kundërtën, ka shumë skuadra afër njëra-tjetrës, nuk ka një ekip që kryeson bindshëm”, është shprehur Sarri.
