Drejtoresha e Qendrës së Shërbimeve Arsimore, Rezana Vrapi ka informuar nxënësit në lidhje me “Këndin e Maturantit”, ku do të afishohen të gjitha ndryshimet që vijnë në Maturën Shtetërore 2020.
Përmes një videomesazhi të shpërndarë në Facebook, Vrapi sqaron se maturantët mund të informohen jo vetëm në faqen zyrtare të QSHA dhe MASR, por gjithashtu edhe në mënyrë të drejtpërdrejtë në “Këndin e Maturantit”, i cili do të jetë i pranishëm në çdo shkollë në Shqipëri.
“Në datën 18 maj, kur maturantët do të rikthehen në shkollë, në “Këndin e Maturantit” do të jetë e afishuar e gjithë procedura e maturës shtetërore”, thotë Vrapi.
Aty nxënësit do të mund të gjejnë detajet jo vetëm në lidhje me testet, por edhe në lidhje me fletë-përgjigjen dhe çdo element tjetër që lehtëson procesin e provimeve në Maturën Shtetërore.
“Mbetet detyrë e mësuesve dhe drejtuesve të shkollave, patjetër edhe vetë maturantëve që ta marrin këtë informacion”, nënvizon ajo.
