Pavarësisht premtimeve se shkollat e vendit kanë ngrohje, realitet është krejt tjetër , ndërsa ata që vuajnë çdo ditë janë fëmijët shqiptarë. Prej katër ditësh të gjitha shkollat e njësisë administrative Baz në Bashkinë e Matit janë pa ngrohje. Shkak për këtë është bërë mungesa e lëndës djegëse.
Drutë e zjarrit të cilat i kanë siguruar këto shkolla nëpërmjet Bashkisë Mat, kanë mbaruar e tashmë kanë mbetur pa u ngrohur.
“Nxënësit e shkollës së mesme të bashkuar “Gjergj Kastrioti” Baz, thonë se janë detyruar të marrin dru nga shtëpitë e tyre pasi është e pa mundur të qëndrojnë në klasë për shkak se temperaturat janë shumë të ulta. Nxënësit pohojnë se: Kemi shumë ftohtë nuk mund të rrimë në klasë, kemi 3 ditë që marrim dru nga shpia pasi nuk rrihet në këtë gjendje”-shkruan Shqiptarja.com
Ndërkaq, mungesën e druve të zjarrit e konfirmon edhe mësues Robert Gjinaj i cili u shpreh se: Edhe pse bashkia e Matit është lajmëruar me kohë për përfundimin e druve të zjarrit, ende nuk i ka sjellë. Sipas Robert Gjinaj: Në shkollën tonë sëbashku me anekset Karic dhe rreth Baz, ku përfshihen rreth 400 nxënës të paktën më shumë se 3 ditë që nuk ka sistem ngrohje.
Kjo është bërë situatë e papranueshme. Janë njoftuar Bashkia Mat dhe Zyra Arsimore nga drejtoria e shkollës. Nuk e dimë se si do të shkojë kjo punë kështu, nxënësit janë të detyruar që prej katër ditësh të mbajnë veshur xhupat dhe kapuçin në orën e mësimit, ka thënë ai.
Nga ana tjetër Bashkia e Matit shprehet se janë vënë në dijeni, ndërsa arsyetohen se së shpejti do të furnizojnë shkollat me dru, por nuk kanë dhënë një datë të caktuar se kur do të ndodhë një gjë e tillë.
