Gazetari i njohur Ismet Drishti është sulmuar fizikisht nga persona me kapuça e me maska. Ngjarja e rëndë ka ndodhur në Tiranë para televizionit “Zjarr Tv”, pronë e Drishtit.
Gazetari ka zbuluar se kanë qenë rreth 15 veta me kapuça e me maska të cilët fillimisht kanë sulmuar televizionin e tij dhe më pas vetë atë. Njëkohësisht Drishti denoncon dhe indiferencën e policisë e cila thuajse nuk po bën asgjë për zbardhjen e ngjarjes.
“Ishin nja 15 vetë, të gjithë me kapuça e me masa. Fillimisht kanë gjuajtur televizionin.
Unë dola menjëherë. U konfrontuan dhe me mua, më shqyen rrobat e gjithçka. Lajmërova policinë, me erdhën vetëm dy policë. Kur bëra ca telefonata më sollën furgon policie. Ndërkohë që deri në 12.00 të natës furgoni policisë ka qenë këtu por ajo që më shqetëson është se biznesi përballë ka kamera. Kam marrë në telefon sot dhe u kam thënë që të vijnë të shohin kamerat dhe të evidentojnë autorët akoma nuk kanë ardhur”, ka rrëfyer gazetari për newsbomb.al.
“Ndoshta kanë qenë edhe grup adoleshentësh, përdorues hashashi. Por me askënd s’kemi pasur konflikt ndaj dyshoj se kanë ardhur posaçërisht për televizionin dhe çuditërisht, askush nga policia nuk lëviz as sot për të marrë kamerat”, denoncon Drishti.
