Dje qyteti i Vlorës u trondit nga maskat. Një situatë kaotike u krijua pas sinjalizimit të vjedhjes së një furgoni, e ndërsa të gjithë pasagjerëve iu morën deri qindarkat e fundit. Një prej pasagjereve i cili është rreth 80-vjeç, tha se grabitësit nën kërcënimin e armëve, i kishin marrë 4 mijë euro. Ai ka rrëfyer se personat e maskuar dhe të armatosur ishin shfaqur krejt papritur te furgoni sapo ishin ndaluar, dhe të gjithë pasagjerët e drejtuesi i mjetit nuk kanë mundur për të ndaluar autorët.
I moshuari, mjaft i tronditur tha se priste të merrte lekët që i biri i kishte dërguar nga Italia. Po kështu ai ka treguar disa detaje, që i kanë shërbyer policisë. Sipas tij, personat mbanin tri armë dhe të gjithë pasagjerët dhe qytetarët që u ndodhën aty pranë, nuk mundën të reagonin, nga frika se mund ti vrisnin. Grabitësit nuk u kanë marrë vetëm lekët, por edhe bizhuteritë dhe një çantë, për të cilën nuk ka asnjë informacion nëse kishte lekë.
Çfarë shume parash ju morën?
Unë kisha rreth katër mijë euro, që m’i dërguan nga Italia. Po m’i dërgonte djali, dhe sot dola t’i marr këtu, m’i dorëzoi shoferi. Por nuk u grabita vetëm unë, por edhe të tjerë. Ishim shumë vetë që prisnim të merrnim lekët apo mallrat që na dërgojnë nga Italia, kur ndodhi gjithçka shumë shpejt.
Çfarë ndodhi, si arritën të vepronin grabitësit dhe të merrnin gjithçka kishte furgoni?
Ishin tre persona, ose të paktën kaq pashë unë. Njëri, me sa mbaj mend, ishte me një pistoletë dhe dy të tjerët me armë të tjera kallashnikovë. Kështu m’u dukën mua armët që ata kishin në dorë. Grabitën ç’të mundnin, edhe bizhuteri dhe një çantë, që nuk di nëse kishte lekë apo jo. Askush nuk mundi të reagonte nën kërcënimin e tri armëve.
Erdhi policia në kohë pas sinjalizimit që dhatë ju?
Po, po, ata erdhën shumë shpejt dhe u vunë në ndjekje. Mbaj mend që kishin një makinë të zezë dhe policia shkoi pas tyre, ndërsa disa të tjerë morën dëshmitë tona. Nuk di çfarë të them, jam shumë i shqetësuar dhe i tronditur. Të shpresojmë se do të kapen, dhe do të marrim lekët tona mbrapsht.
