Pesë persona kanë përfunduar në prangat e policisë serbe në Preshevë, pasi dyshohet se kanë mashtruar me receta mjekësore. Për pasojë, sigurimi shëndetësor serb është dëmtuar për 9.8 milionë dinarë, afro 84 mijë euro.
Tre prej të arrestuarve janë punëtorë shëndetësorë në Shtëpinë e Shëndetit në Preshevë, një identifikohet si pensionist dhe një tjetër ushtron funksionin e farmacistit.
Dyshohet se këta persona, përmes mashtrimit, kishin abuzuar me recetat mjekësore, dhe kësisoj kanë dëmtuar Fondin Republikan për Sigurime Shëndetësore me vlerë 9.8 milionë dinarë të Serbisë, raporton “gazetametro.net”.
“Dyshohet se FN, A.B, K.A dhe R.J që nga janari i 2016’s deri në fund të 2017’s pacientëve i shkruanin receta për barna pa raportin e mjekut specialit në sasi më të madhe të lejuar të normës së caktuar mujore, në kundërshti me rregulloren e listës së barnave të cilat shpërndahen nga fondet e sigurimit obligator shëndetësor dhe Rregullores për përmbajtje dhe shtrirjes së të drejtave në sigurimin shëndetësor dhe participimin.
I dyshuari F.N. dyshohet se me receta kishte marrë barnat në barnatoret në Preshevë dhe i kishte shitur në territorin e Kosovës”, thuhet në njoftimin e policisë serbe.
