Një sherr për motive të dobëta ka degjeneruar, aq sa një 35-vjeçarë ka goditur tre persona me thikë, duke i plagosur.
Sipas informacioneve nga policia 35-vjeçari E.SH. ka tentuar të vrasë me thikë shtetasin L.Ç., 20 vjeç, A.Ç., 23 vjeç dhe D.S., 15 vjeç banues në Karbunarë.
Të tre shtetasit e dëmtuar ndodhen në Spitalin Lushnje nën kujdesin e mjekëve jashtë rrezikut për jetën.
Nga hetimet ka rezultuar se pas ngjarjes, shtetasi E.SH. është ndihmuar për t’u larguar nga vendi i ngjarjes nga shtetasi Renato Pupi, i cili me mjetin tip “Benz” në pronësi të tij, e ka marrë nga vendi i ngjarjes dhe e ka ndihmuar për t’i shpëtuar kapjes nga policia dhe për t’u fshehur.
Specialistët për Hetimin e Krimeve në Komisariatin e Policisë Lushnje bënë të mundur kapjen dhe arrestimin në flagrancë të shtetasit:
-Renato Pupi, 28 vjeç, banues në Këmishtaj, Divjakë.
Nga ana e policisë është bërë sekuestrimi i automjetit tip “Benz” në pronësi të shtetasit Renato Pupi, si dhe po punohet për kapjen dhe ndalimin e autorit të dyshuar, shtetasit E.SH.
Materialet iu referuan Prokurorisë Pranë Gjykatës së Shkallës së Parë Lushnje në ngarkim te shtetasit E.H. për veprën penale “Vrasje në rrethana të tjera cilësuese” e mbetur në tentativë dhe në ngarkim te shtetasit Renato Pupi për veprat penale “Moskallëzimi i krimit” dhe “Përkrahja e autorit të krimit”.
