Detaje të reja janë hedhur në dritë sa i takon ngjarjes së rëndë ndodhur dje në Sarandë, ku pas një sherri për parkimin pati edhe një viktimë. Blutë e Sarandës bëjnë me dije se kanë vënë në pranga dy vëllezër dhe punëdhënësin e tyre, i cili tentoi që të fshihte ngjarjen.
Xhanelo dhe Xhoi Taraj janë dy vëllezërit që u arrestuan në Sarandë, pasi goditën me thikë në zemër 41-vjeçarin Klodian Bakia, i cili ndërroi jetë në spital. Shkak për fillimin e konfliktit u bë parkimi i automjetit nga Bakia përpara hotelit ku punonin vëllezërit.
Në pranga ka rënë dhe Genci Ahmeti, punëdhënësi i vëllezërve vrasës. Ai tentoi të fshihte ngjarjen që ndodhi mbrëmjen e djeshme në afërsi të hotelit që kishte marrë me qera për sezonin veror. Dy vëllezërit, në bashkëpunim me njëri-tjetrin, dyshohen se mbrëmjen e djeshme në rrugën “Lefter Kalo”, në lagjen nr. 1, Sarandë, pas një konflikti të çastit, për motive të dobëta, për një vend parkimi në afërsi të hotelit ku ishin të punësuar, kanë goditur me mjet prerës (thikë) 41-vjeçarin Klodian Bakia, banues në Tepelenë. Ky i fundit, si pasojë e dëmtimeve të marra, ndërroi jetë në spitalin e Sarandës.
Vëllezërit vrasës, banues në Laç
Dy vëllezërit, banues në Laç dhe të punësuar përkohësisht në Sarandë, akuzohen për veprat penale “Plagosja e rëndë me dashje”, me pasojë vdekjen, kryer në bashkëpunim dhe “Prodhimi, mbajtja, blerja apo shitja pa leje e armëve të ftohta”. Ata u arrestuan nga policia e Sarandës vetëm pak orë pas ngjarjes së rëndë, pasi ishin fshehur në garazhin e dy pallateve.
