Detaje të reja kanë dalë nga vrasja e 23-vjeçarit Gledis Kraja në Shkodër. Burimet bëjnë me dije se i riu është vrarë aksidentalisht nga shoku i tij, Sebastian Smakaj. Mësohet se ngjarja e rëndë ndodhi gjatë një konflikti mes Sebastian Smakajt dhe pronarit të një mobilerie.
I riu humbi jetën në spitalin rajonal të Shkodrës, duke mos arritur që t’i bëjë ballë plumbave që kishte në trup. Autor i dyshuar i vrasjes së 23-vjeçarit është shtetasi Sebastian Smakaj, dhe i dyshuar si bashkëpunëtor vëllai i tij, Stjuart Smakaj të cilët janë shpallur në kërkim.
Vëllai i autorit të dyshuar, ka qenë shok i ngushtë më viktimën. Nga sa mësohet, 23-vjeçari është vrarë gabimisht nga shoku i tij.
Po çfarë ndodhi që situata u agravua, deri në marrjen e jetës së 23-vjeçarit?
Autori i dyshuar ka porositur mobilje për shtëpinë në një kompani në Shkodër. Porosia e mobiljeve i ka mbërritur poshtë pallatit. Autori i dyshuar ka nisur një debat për parkimin e kamionit që kishte sjellë mobiljet, për shkak se ishte bllokuar rruga, raporton ‘Panorama’.
Në atë çast ka vijuar debati me shoferin e kamionit që solli mobiljet. Më pas aty ka mbërritur edhe pronari i kompanisë së mobiljeve, me të cilin autori i dyshuar ka vazhduar debatin.
Më pas shtetasi Sebastian Smakaj dyshohet se ka shkuar dhe ka marrë armën e zjarrit tip automatik kallashnikov, dhe ka ardhur në drejtim të vendit ku ka debatuar. Aty dyshohet se ka nisur që të qëllojë në drejtim të pronarit të mobiljeve, por gabimisht një plumb ka kapur në shpatulla shokun e tij, Gledis Kraja i cili humbi jetën në spital.
Viktima në momentin kur mbeti i plagosur, është dërguar në spital nga vëllai i madh i autorit të dyshuar. Policia vijon hetimet për zbardhjen e plotë të ngjarjes, dhe kapjen e autorit të dyshuar dhe vëllait të tij.
