Autori i dyshuar i vrasjes së dyfishtë në Lezhë mbrëmjen e 29 gushtit, shtetasi Besnik Pjetri, mësohet se ka qenë në konflikt prej 6 vitesh me familjen e ish-gruas së tij. Besnik Pjetri është në kërkim nga policia, për vrasjen e ish-vjehrrit Pjetër Perjaku dhe ish-kunatit Gent Perjaku.
Besnik Pjetri ishte divorcuar prej 6 vitesh me vajzën e familjes Perjaku, me të cilën ka dy fëmijë. Por gjatë gjithë kësaj kohe ai ka qenë në konflikt me familjarët e ish-gruas.
Ngjarja kulmoi mbrëmjen e djeshme, teksa Besnik Pjetri shkoi në banesën e ish-vjehrrit dhe ish-kunatit në fshatin Grykë Zezë të Lezhës, ku i qëlloi me breshëri arme duke i lënë të vdekur. Krimi i rëndë ndodhi rreth orës 23:00.
Autori kishte dy fëmijë nga martesa me vajzën e viktimës, ndërsa jetonin më herët në Itali. Ata thuhet se vazhdimisht kanë pasur konflikte me njëri-tjetrin, për çështje ekonomike.
Gjatë kësaj periudhe, ai kishte patur konflikte të vazhdueshme me ish-gruan dhe me familjen e saj. Madje ai ishte denoncuar edhe nga ish-gruaja për dhunë në Itali, ku edhe ka bërë 2 vite burg. Ndërkohë viktimat sapo ishin kthyer nga Italia në banesën e tyre në Lezhë.
