Dy dëshmi kontradiktore vijnë pas tragjedisë në Selenicë, me 8 të vdekur. Autori i masakrës, Ritvan Zykaj, është rrëfyer në polici se shkak janë bërë pulat e detit, për të cilat, njëra prej viktimave e akuzonte për vjedhje. Por banorë të fshatit Resulaj theksojnë se mes dy familjeve kishte pasur konflikte të herëpashershme për çështje pronash. Sipas tyre, familja e 8 viktimave kishte jetuar më parë lart në kodrinë, shkruan “Panorama”.
Pas viteve 2000, ata kishin zbritur në fshat, ku ndërtuan banesat në tokat e tyre. Kaq ka mjaftuar që të tensionohej situata, pasi kjo nuk është mirëpritur nga familja e autorit të krimit. Në lidhje me këtë rast, nënkryetari i Bashkisë së Selenicës, Neim Veshaj, pranoi se ishte në dijeni të këtij konflikti. Sipas tij, dy familjet nuk ishin ankuar asnjëherë zyrtarisht në Bashki, për mosmarrëveshje për çështje pronash. Por, ai theksoi se e kishte mësuar një gjë të tillë nëpërmjet banorëve të fshatit.
Ky shkak dyshohet të ketë ndikuar që të tetë familjarët e vrarë, të mos varroseshin në varrezat e fshatit, por në pronën e tyre. “E kam dëgjuar nga banorët këtë konflikt, por zyrtarisht asnjëherë nuk ka ardhur një ankesë prej tyre.
Ne si Bashki ende nuk kemi vendosur nëse do t’u akordohet një fond ndihmese të mbijetuarve. Mbledhja që organizuam për shpenzimet e varrimit ishte në kushte emergjente. Tashmë, ne do të vendosim sesi do të procedojmë më tej me të mbijetuarit, e për t’i ndihmuar ata”, u shpreh Veshaj.
