Një sërë bombardimesh në Sri Lanka u morën jetën 290 personave dhe shkaktuan rreth 500 të tjerë të plagosur. Por, kush fshihet pas këtyre sulmeve në kisha dhe hotele që ndodhën pikërisht në ditën e Pashkëve?
Sipas zyrtarëve, masakra mund të jetë kryer me mbështetjen dhe ndihmën e rrjeteve ndërkombëtare. Qeveria ka fajësuar një grup të vogël lokal xhihadist, i quajtur “National Thowheed Jamath”, edhe pse asnjë nga ky grup nuk e ka pranuar autorësinë.
Policia ka arrestuar 24 persona në një seri bastisjesh, ndërsa zyra e presidentit shpalli gjendje të jashtëzakonshme kombëtare. Deklarata emergjente, do t’i japë policisë dhe ushtrisë kompetenca të gjera për të kapur dhe marrë në pyetje të dyshuarit pa urdhra të gjykatës.
Të hënën, një tjetër shpërthim tronditi një rrugë pranë një kishe në kryeqytet, Colombo. Policia po përpiqej të çaktivizonte eksplozivët në një automjet të përdorur nga sulmuesit kur shpërtheu. Nuk dihet ende nëse dikush është lënduar.
Autoritetet e Sri Lankës u paralajmëruan për një kërcënim me bombë nga National Thowheed Jamath dy javë para sulmeve, tha zëdhënësi i kabinetit Rajitha Senaratne në një konferencë shtypi.
Senaratne tha se autoritetet besonin se bombarduesit kishin mbështetje ndërkombëtare.
“Ne nuk besojmë se këto sulme janë kryer nga një grup njerëzish të cilët ishin të mbyllur në këtë vend”, tha ai, duke shtuar: “Ka pasur një rrjet ndërkombëtar pa të cilin këto sulme nuk mund të kishin arritur”.
Një deklaratë e mëvonshme tha se Presidenti Maithripala Sirisena do të kërkonte ndihmë nga jashtë për të gjetur lidhjet ndërkombëtare me sulmuesit.
“Raportet e inteligjencës [tregojnë] se organizatat terroriste të huaja janë prapa terroristëve lokalë, prandaj presidenti do të kërkojë ndihmën e vendeve të huaja,” tha zyra e tij.
Departamenti Amerikan i Shtetit lëshoi këshilla për të rishikuar planet për udhëtim duke kërkuar kujdes më të madh, teksa shtoi se grupet terroriste vazhdojnë të planifikojnë sulme të mundshme në Sri Lanka./ Përshtati Tirana Today
