Policia e Shtetit vijon të mos ketë një version zyrtar të motiveve që e çuan 24-vjeçarin, në aktin makabër duke ekzekutuar 8 persona të një fisi.
Përmes një njoftimi për shtyp, Policia e Shtetit thekson se hetimet po vijojnë dhe ende nuk ka një version zyrtar mbi motivet e kësaj masakre.
Sipas policisë, autori është akoma duke u marrë në pyetje nga uniformat blu të Vlorës dhe se po pyetet në vazhdimësi për rrethanat e krimit edhe pse me deklarimet e bëra deri tani motivet mbeten për shkaqe banale.
“Nga hetimet e deri tanishme dhe nga deklarimet paraprake të shprehura prej tij, ka rezultuar se e ka kryer aktin kriminal për motive të dobëta/banale, (autori është shprehur se pjesëtarë nga dy familjet Zykaj e kanë akuzuar për vjedhje)”, thekson Policia e Shetit
Informacion shtesë nga Policia e Shtetit: Në lidhje me ngjarjen e rëndë të ndodhur pasditen e datës 10.08.2018, ku u vranë me armë zjarri 8 pjesëtarë të dy familjeve ju informojmë se:
Grupi hetimor me ekspertë të Policisë Kriminale të DVP Vlorë dhe të Departamentit të Policisë Kriminale në bashkëpunim me Prokurorinë e Rrethit Gjyqësor Vlorë, po vijojnë hetimet lidhur me motivin e plotë të krimit të kryer prej 24 vjeçarit në fshatin Resulaj.
Qe prej momentit qe u shoqërua në ambientet e DVP Vlorë, autori po pyetet në disa seanca nga strukturat policore përkatëse mbi rrethanat e krimit.
Nga hetimet e deri tanishme dhe nga deklarimet paraprake të shprehura prej tij, ka rezultuar se e ka kryer aktin kriminal për motive të dobëta/banale, (autori është shprehur se pjesëtarë nga dy familjet Zykaj e kanë akuzuar për vjedhje).
Lidhur mbi këtë por edhe në pista të tjera Policia po vijon hetime të imtësishme deri në zbardhjen e plotë të rrethanave të ngjarjes.
