Gjykata e Shkodrës ka dhënë masën e sigurisë “arrest me burg” për dy mjekët Ervin Sulaj dhe Serdi Memini si dhe infermieren nga Shkodra, Diellë Macaj. Arrestimi i tyre erdhi pasi kishin pranuar para ryshfet për të kryer operacionin e 17-vjeçarit Elmidin Dyli, i cili mbeti i plagosur në vrasjen e katërfishtë në Velipojë. Ndërsa për babain e tij, Fatbardh Dyli gjykata caktoi masën e sigurisë “detyrim paraqitje”, për shkak se nuk rezulton të ketë element të veprës penale.
Mjeku Ervin Sulaj ka mohuar se ka lidhje me marrje ryshfeti, duke thënë se ai dhe kolegu i tij janë marrë vetëm me operacionin e të plagosurit Elmidin Dyli. Ndërkohë mjeku tjetër kirurg Serdi Memini ka munguar në seancë, për shkak se është i shtruar në spital në Tiranë dhe nuk është në gjendje shëndetësore të mirë, ndërsa është përfaqësuar nga avokati i tij.
Avokatët mbrojtës të dy mjekëve kërkuan që ndaj të dyshuarve të mos caktohet asnjë masë sigurimi dhe madje të cilësohet i paligjshëm arrestimi i tyre, por gjykata nuk e pranoi këtë kërkesë duke i lënë me masën e sigurisë “arrest me burg”.
