Presidenti Ilir Meta tha sonte se do të blindojë nga ana kushtetuese procesin e marrëveshjes së detit me Greqinë. I ftuar në emisionin “Studion e Hapur”, Meta tha se nuk do të përsëritet gabimi i vitit 2009. Presidenti deklaroi se këtë herë është kushtetuta ajo që do të prevalojë në çdo pikë të marrëveshjes. Ai tha se duhet të jetë një marrëveshje e drejtë për të dyja vendet sepse do të mbetet për gjithmonë.
“Unë do të përmbush të gjitha detyrimet e mia kushtetuese që kjo të jetë një marrëveshje sa më e blinduar nga ana Kushtetuese, që të mos na ndodh më ajo që na ndodhi ne vitin 2009 me vendimin e vitit 2010 për shkak të parregullsive. Këtë radhë vendimi i gjykatës kushtetuese është kushtetuta për këtë çështje. Dhe pikat e saj janë shumë të karta dhe nuk janë të pakta. Duhet të jetë një marrëveshje e drejtë për të dyja vendet sepse do të mbetet për gjithmonë.
Nuk jam këtu për të dhënë opinion për marrëveshjen e 2009 sepse përgjigjen për atë marrëveshje e ka dhënë gjykata kushtetuese,” deklaroi Meta.
