Anija e parë që transportonte grurë është larguar nga një port ukrainas, sipas një marrëveshje historike me Rusinë. Zyrtarët turq dhe ukrainas thonë se anija u largua nga porti jugor i Odesa-s herët në mëngjes të hënën me orën lokale. Rusia ka bllokuar portet e Ukrainës që nga shkurti, por të dyja palët ranë dakord për një marrëveshje për të rifilluar dërgesat.
Shpresohet se marrëveshja do të lehtësojë krizën globale të ushqimit, dhe do të ulë çmimin e drithit. Turqia tha se anija me flamur të Sierra Leone, Razoni, do të ankorohej në Liban, duke shtuar se dërgesat e tjera ishin planifikuar gjatë javëve të ardhshme.
Qendra e Përbashkët e Koordinimit, e krijuar në Stamboll sipas marrëveshjes, tha se anija mbante rreth 26.000 ton misër dhe pritej të mbërrinte në ujërat turke për inspektim të martën. Sekretari i Përgjithshëm i OKB-së Antonio Guterres përshëndeti nisjen e anijes dhe vlerësoi Turqinë për rolin e saj në punën për zbatimin e marrëveshjes.
“Sot Ukraina, së bashku me partnerët, ndërmerr një hap tjetër për të parandaluar urinë në botë”, shkroi në Facebook ministri i Infrastrukturës së Ukrainës, Alexander Kubrakov.
Zhbllokimi i porteve do të sigurojë të paktën 1 miliard dollarë të ardhura nga këmbimi valutor për ekonominë, dhe një mundësi për sektorin e bujqësisë që të planifikojë vitin e ardhshëm. Kubrakov shtoi se 16 anije të tjera po prisnin të niseshin në portet e rajonit të Odesës në javët e ardhshme.
Marrëveshja e muajit të kaluar – e ndërmjetësuar nga OKB-ja dhe Turqia – u deshën dy muaj për t’u arritur dhe do të zgjasë për 120 ditë. Mund të rinovohet nëse të dyja palët bien dakord.
Marrë me shkurtime nga BBC. Përshtatur nga Tirana Today
