Është një nga historitë më të famshme, dhe në të njëjtën kohë më tragjike të dashurisë. Po flasim për atë midis sopranos së famshme Maria Kalas dhe miliarderit Aristotel Onazis. Një histori dashurie e krahasueshme me një tragjedi greke, ashtu si origjina helene e të dyve, dhe e cila preku fundin kur Onazis u martua me Zhaklin Kenedin, gjë që e zhyti në depresion artisten më famë botërore.
Maria Kalas, një artiste e jashtëzakonshme
E pajisur me një zë të veçantë, që ndërthurte timbrin unik me volumin e jashtëzakonshëm, dhe me një shtrirje dhe shkathtësi të pashoqe, Maria Kalas njihet ende sot si sopranoja më e famshme në botë e të gjitha kohërave. Pas suksesit të tij si artiste qëndron një jetë intensive, por e trazuar, që në moshë të vogël.
Ndarja e prindërve të saj, dhe largimi nga babai me të cilin ishte shumë e lidhur, konfliktet me nënën e saj. Por mbi të gjitha dashuria e pamundur me Onazis, që la tek ajo gjurmë të thella. Aristoteli ishte një pronar anijesh shumë i pasur, një dashnor i jetës së mirë dhe i grave të bukura.
Në vitin 1945 ai u martua me Athina Livanos, vajzën e pronarit të anijeve, Stavros Livanos, me të cilën pati 2 fëmijë. Në vitin 1957 ai u divorcua nga Athina, por vazhdoi të frekuentonte ambientet mondane të kohës.
Takimi i parë
Takimi i parë midis Kalas dhe Onazis ndodhi në vitin 1957 gjatë një pritje në Venecia në hotelin Danieli, të organizuar për nder të saj nga Elsa Makseull. Të dy u takuan sërish në dhjetor 1958. Onazis shkoi të vlerësonte personalisht bashkatdhetaren e tij në dhomën e saj të zhveshjes pas debutimit triumfues të Kalas në koncertin “La Grande Notte dell’Opera” në Paris.
Vitin që pasoi Onazis organizoi një darkë për nder të saj në “Hotel Dorchester” në Londër, me rastin e premierës së operës “Medea” në “Covent Garden”. Një muaj më vonë të dy i kaluan pushimet verore në jahtin “Christina” për një udhëtim së bashku me ish-kryeministrin britanik Uinston Çërçill, gruan e tij, dhe personalitete të tjera ndërkombëtare. Pas dy javësh, kur jahti u kthye në Montekarlo, Maria Kalas ishte dashuruar marrëzisht me Onazis. Ajo e la burrin e saj, italianin Batista Menegini.
Një histori dashurie e trazuar
Por marrëdhënia midis Kalas dhe Onazis u shoqërua që në fillim me debate, si për statusin e tyre (të dy të martuar), ashtu edhe për diferencën në moshë (ajo ishte 36 vjeçe, ai 53). Historia e tyre, që zgjati 10 vjet, ishte intensive, por shumë e trazuar, plot me xhelozi, grindje dhe tradhti.
Manjati grek e mbajti Kalas jashtë vëmendjes së medias, teksa i premtoi asaj një martesë që nuk ndodhi kurrë. Nga historia e tyre e dashurisë lindi një fëmijë, Homeri, që fatkeqësisht vdiq disa orë pas lindjes për shkak të problemeve me frymëmarrjen.
Në vitin 1966 Maria Kalas hoqi dorë nga shtetësia e saj amerikane dhe ajo italiane, për të rimarrë atë greke. Ajo e bëri këtë me shpresën se do t’i jepte fund karrierës me një martesë të re. Por Aristotel Onazis jo vetëm që e refuzoi martesën me të, por në vitin 1968, pas mosmarrëveshjeve të ashpra me partneren e tij, vendosi të martohej me Zhaklin Kenedi, vejushën e ish-presidentit amerikan Xhon Kenedi.
Rënia e sopranos
Nga ai moment filloi rënia e ngadaltë e Marias së ngratë. Sopranoja u izolua në apartamentin e saj në Paris, dhe shmangu kontaktet me të njohurit dhe miqtë. Në nëntorin e vitit 1974, ajo vendosi të tërhiqej nga skena pas turneut në Saporo të Japonisë, bashkë me tenorin italian Xhuzepe Di Stefano.
Goditjen fatale e mori në marsin e vitit 1975, kur mësoi lajmin e vdekjes së Onazisit të saj. Dy vjet më vonë, vdiq edhe vetë Maria Kalas. Shëndeti i saj ishte rënduar prej kohësh. Raporti mjekësor tha se shkak i vdekjes ishte arresti kardiak, duke mohuar kësisoj zërat për një vetëvrasje.
Burimi i lajmit: https://libreriamo.it/storie/storie-damore/maria-callas-e-aristotele-onassis-storia-di-un-amore-travolgente-e-doloroso/
Përshtatur nga TIRANA TODAY
