Rreth dy muaj më parë janë shpërndarë disa mesazhe audio në “WhatsApp” të cilët lajmëronin vdekjen e legjendës së Argjentinës, Diego Armando Maradonës. Një mesazh i rremë për të cilin vetë Maradona ishte angazhuar për të zbuluar se kush ishte personi që i shpërndau këtë lajm të rremë.
E përditshmja argjentinase “Clarin” ka bërë të ditur se “el Diez” me ndihmën e disa ekspertëve të informatikës, ka gjetur krijuesin e lajmit të pavërtetë. Vetëm pak ditë pas incidentit, ish-sulmuesi i Argjentinës vendosi një shpërblim për të zbuluar identitetin e vërtetë të këtij personi.
Kjo formë nuk funksionoi dhe Diego është vënë vetë në lëvizje dhe me anë të disa ekspertëve të teknologjisë ka gjetur personin që bëri këtë veprim dhe tashmë ai i detyrohet një dëmshpërblim, me një kusht, që ky i fundit ta mbajë të fshehtë identitetin e tij.
Ndërkohë, avokati i Maradonës, Matias Morla ka thënë për të përditshmen “Clarin”: “Ky rast duhet të kthehet në një simbol për dy arsye. E para është që një tjetër do të mendohet mirë para se të bëjë një shaka të tillë dhe e dyta është se drejtësia duhet të fillojë të marrë masa për të gjetur menjëherë përgjegjësit e këtyre gjërave”.
