Situata politike në Maqedoni, pritet të bjerë në rrjedhë normale pasi Presidenti, George Ivanov i dha sot mandatin për krijimin e qeverisë së re, kreut të LSDM-së Zoran Zaev, dy ditë para përfundimit të afatit kushtetues.
Vendimi i shumëpritur i kreut të shtetit, mendohet të jetë i ndikuar jo pak nga bashkëbisedimi me diplomatin amerikan, Hoyt Yee, i cili gjendet në një vizitë në Ballkan.
Në një intervistë për “Balkan Insight” zyrtari i lartë amerikan ka thënë se ai besonte që Presidenti Gjorge Ivanov do të bëjë “gjënë e duhur” dhe do t’ia japë mandatin liderit të LSDM-së Zoran Zaev, për të formuar një qeveri.
“Presidenti, me të cilin jam takuar dhe kishim një bisedë shumë të mirë, i ka kuptuar pritjet tona. Ne presim qeveri, presidenti, ta bëjë atë që është e nevojshme për të përmbushur standardet demokratike . Ne besojmë se duhet të caktohet mandati i këtij koalicioni që ka shumicën në parlament për të formuar një qeveri dhe për të filluar arritjet e këtyre reformave që janë të nevojshme për Maqedoninë për të ecur përpara në rrugën e integrimit”, ka thënë Yee në këtë intervistë.
