Lideri i LSDM-së, Zoran Zaev, është i bindur se qeveria e re formohet brenda këtij muaj. Zaev tha se qeveria e re do të mundësojë procesin demokratik të ecë përpara në ngritjen e institucioneve shtetërore, të cilat patjetër duhet të jenë në shërbim të qytetarëve.
“Pres që në muajin maj Maqedonia të ketë qeveri të re. Flas edhe për afatet, kur duhet të negociojmë, t’i paraqesim në Kuvend, Kuvendi t’i diskutojë tre ditë në përputhje me rregullat dhe të zgjidhet qeveria. Ka rrethana reale në Maqedoni që në muajin maj të ketë qeveri të re”, shprehet Zaev.
Kreu i LSDM-së, Zaev, gjithashtu, hodhi poshtë mundësinë e konflikteve ndëretnike në Maqedoni, duke theksuar se konflikti në Kuvend ishte politik jo etnik.
“Unë jam i kënaqur që ka humbur çdo shpresë për konflikte ndëretnike apo diçka të ngjashme. Partitë shqiptare dërguan njoftimet e tyre, thirrjet, të gjithë të jemi të bashkuar, të jemi të qetë, të durueshëm dhe të mos veprojmë. Populli është i qetë, askush nuk dëshiron përplasje, konflikte dhe ajo do të përfundojë. Kjo që ndodhi si konflikt ishte më shumë partiak, nuk ishte etnik, për shkak se VMRO-DPMNE-ja sulmoi partitë tjera, përfaqësuesit e të cilave ishin aty, përfshirë edhe mediat dhe gazetarëve që ishin aty”, deklaroi Zaev.
Ai thekson se në periudhën e ardhshme pret përmirësim të bashkëpunimit ndëretnik në Maqedoni, ndërsa ai bashkëpunim do të ketë dobi të madhe në zhvillimin e përgjithshëm dhe rritjen e ekonomisë, si dhe në përgjithësi, në dobi të shoqërisë në vend.
