Publikohen të tjera video dhe dëshmi nga dhuna mbi deputetët në Kuvendin e Maqedonisë. Pritje me brohoritje të personave të maskuar që rrahën brutalisht deputetët e LSDM dhe kreun e LR-PDSH, Ziadin Sela.
Njëri nga përkrahësit e tyre dëgjohet t’u thotë huliganëve se përse nuk sollën kokat e tyre, duke mos saktësuar se cilit i referohej, shkruan INA.
Ministria e Punëve të Brendshme ka bërë publike se pas ngjarjeve të djeshme dhe trazirave, 83 persona kanë kërkuar ndihmë mjekësore në spitalet e Shkupit, nga të cilët 54 qytetarë, 25 policë dhe 3 deputetë e 1 gazetar.
Shumica e të lënduarve janë larguar nga spitalet, por disa janë mbajtur për kurim më të specializuar, si shkak i lëndimeve më serioze.
Ministria bëri me dije se janë arrestuar 8 persona, të cilët kanë ushtruar dhunë në Parlamentin e Maqedonisë dhe po mbahen në stacion policor.
Ministri i Punëve të Brendshme i Maqedonisë, Agim Nuhiu, tha se një pjesë e strukturave udhëheqëse të dikasterit të policisë nuk e kanë kryer punën si duhet dhe për këtë duhet të mbajnë përgjegjësi.
