Në Maqedoninë e Veriut është shënuar viktima e parë nga varianti britanik i Covid-19.
Personi i cili humbi jetën, u identifikua me variantin e ri më 4 janar dhe ishte një nga dy rastet e reja të zbuluara së fundmi. Më parë, lloji i ri britanik u zbulua në një 46-vjeçar nga Shkupi, i cili tashmë ishte shëruar.
Sipas mediave në vendin fqinj, do të shqyrtohet mundësia që të mos ketë të tjerë të infektuar me këtë virus të rrezikshëm, veçanërisht nga grupi i fundit i Klinikës së Nefrologjisë, ku për një periudhë të shkurtër kohore ka dhjetëra pacientë.
Mjekët paralajmërojnë se për shkak se transmetohet kaq lehtësisht ndryshe nga mutacionet e tjera, ai me siguri do të bëhet dominues në vend pas disa muajsh, si në shumë vende të tjera të botës.
Në shtator të vitit 2020, në Londër u zbulua një variant i ri i Covid-19, i cili sipas studimeve më të fundit është 30% më vdekjeprurës dhe 70% më njgitës.
Organizata Botërore e Shëndetësisë, (OBSH) ka deklaruar se ky variant tashmë është përhapur në 70 shtete në të gjithë botën.
